Saltar ao contido principal
Manual práctico de Renda 2024. Tomo 2. Deducións autonómicas

Por nacemento

Normativa: Art. 6 ter Texto Refundido das disposicións legais da Comunidade Autónoma das Illes Balears en materia de tributos cedidos polo Estado, aprobado por Decreto Lexislativo 1/2014, do 6 de xuño

Contía da dedución

  • 800 euros polo primeiro fillo ou filla.

  • 1.000 euros polo segundo fillo ou filla.

  • 1.200 euros polo terceiro fillo ou filla.

  • 1.400 euros polo cuarto fillo ou filla e seguintes.

Para os efectos de determinar o dereito a esta dedución e o número de orde do fillo nado, teran en contase os fillos que convivan co contribuínte e para os que se poida aplicar o mínimo por descendentes á data de devindicación do imposto, e computaranse tanto os fillos naturais como os adoptivos.

Requisitos e outras condicións para a aplicación da dedución

  • Que o contribuínte fose residente fiscal nas Illes Balears no exercicio anterior ao do nacemento.

  • Que o fillo ou filla nada no período impositivo xere o dereito á aplicación do mínimo por descendentes.

  • Que a suma da base impoñible xeral e a do aforro, recadros [0435] e [0460] do contribuínte, non supere os seguintes importes:

    1. En xeral:

      • - 52.800 euros en tributación individual.

      • - 84.480 euros en tributación conxunta.

      Atención : para os contribuíntes falecidos con anterioridade ao 13 de decembro de 2024 o límite anterior será de 33.000 euros.

    2. No suposto de familias numerosas ou familias monoparentais con dous ou máis fillos ou fillas previstas no artigo 7.7 da Lei 8/2018, do 31 de xullo, de apoio ás familias:

      • - 63.360 euros en tributación individual.

      • - 101.376 euros en tributación conxunta.

      Atención : para os contribuíntes falecidos con anterioridade ao 13 de decembro de 2024 o límite anterior será de 39.600 euros.

    Con esta finalidade, son familias numerosas tanto as que determina a Lei 40/2003, do 18 de novembro, de Protección ás Familias Numerosas como as familias monoparentais cun fillo con discapacidade recoñecida do   33% ou superior.

    Adicionalmente, de acordo cos apartados 1 e 2 do artigo 7 da Lei 8/2018, do 31 de xullo, de apoio ás familias:

    • - As familias monoparentais son as que están formadas por un ou máis fillos ou fillas que cumpren os requisitos establecidos no apartado 3 do citado artigo 7 da Lei 8/2018 e que dependen economicamente dunha soa persoa proxenitora, titora, acolledora ou adoptante, con quen conviven.

    • - Ademais, tamén se consideran familias monoparentais as seguintes:

      • a) A familia en que o proxenitor ou proxenitora con fillos ou fillas a cargo convive ao mesmo tempo con outra persoa ou persoas con quen non ten ningunha relación matrimonial ou unión estable de parella, de acordo coa lexislación civil.

      • b) A familia en que o proxenitor ou proxenitora que ten a garda dos fillos ou fillas non percibe ningunha pensión polos alimentos destes fillos ou fillas establecidas xudicialmente e ten interposta a correspondente denuncia ou reclamación civil ou penal.

      • c) A familia en que o proxenitor ou proxenitora con fillos ou fillas a cargo sufriu abandono de familia por parte do outro proxenitor.

    Importante : os contribuíntes que superen os anteriores límites de renda e que non falecesen con anterioridade ao 13 de decembro de 2024 terán dereito a aplicar o 50% da dedución correspondente.

  • Cando concorran dous contribuíntes con dereito á dedución e non opten pola tributación conxunta, o importe ratearase entre estes a partes iguais.

  • No caso de que o número de fillos de cada contribuínte dea lugar á aplicación dun importe diferente, cada un aplicarase a metade da dedución que lle corresponda en función do número de fillos preexistentes. Se se dá esta circunstancia e a declaración é conxunta, a dedución será a suma de que correspondería a cada un se a declaración fóra individual.

Aboamento anticipado

Os contribuíntes con dereito á aplicación desta dedución poden solicitar á consellaría competente en materia de facenda, nos termos que se establezan mediante unha Orde da persoa titular da devandita consellaría, o aboamento anticipado desta dedución, que será, se é o caso, obxecto de regularización no momento de presentar a declaración do imposto.

O eventual exceso do importe do pagamento anticipado respecto da contía da dedución ten a consideración de prestación pública por nacemento, exenta de gravame en aplicación do artigo 7.h) da Lei do IRPF.

Orde de aplicación e saldo pendente de aplicación

  • No caso de que esta dedución concorra con outras deducións autonómicas, esta aplicarase en primeiro lugar .

  • A aplicación desta dedución non pode dar como resultado unha cota líquida negativa.

  • Se hai insuficiencia de cota íntegra autonómica, de maneira que non se poida aplicar esta dedución na contía total, o contribuínte pode solicitar á consellaría competente en materia de facenda, nos termos que se fixen mediante unha orde da persoa titular da citada consellaría, o aboamento do importe que non se puidese deducir.

  • A renda imputable ao contribuínte que poida resultar ten a consideración de prestación pública por nacemento, exenta de gravame en aplicación do artigo 7.h) da Lei do IRPF.

Incompatibilidade

Esta dedución resulta incompatible coa percepción de axudas e prestacións públicas concedidas ou outorgadas pola comunidade autónoma das Illes Balears por causa de nacemento.

Importante:unha vez introducida polos contribuíntes con dereito á dedución a información necesaria para o seu cálculo, será automaticamente trasladada ao apartado "Información adicional ás deducións autonómicas das Illes Balears por nacemento e adopción" do Anexo B.11 da declaración.