IVE reducido en compra, adaptación ou reparación de vehículos para persoas con discapacidade

Tributan ao 4 %:

1. As vendas de autotaxis ou autoturismos especiais destinados a ser utilizados para o transporte de persoas con discapacidade en cadeira de rodas, directamente ou previa a súa adaptación, e as vendas de vehículos destinados ao transporte de persoas con discapacidade en cadeiras de rodas ou con mobilidade reducida, con independencia de quen sexa o condutor dos mesmos, sempre que concorran os seguintes requisitos :

   • Que transcorresen polo menos 4 anos desde a matriculación doutro vehículo en análogas condicións. Non obstante, este requisito non se esixirá en supostos de sinistro total dos vehículos, debidamente acreditado.

   • Que non sexan obxecto dunha transmisión posterior por actos «inter vivo» durante o prazo dos catro anos seguintes á data da súa matriculación.

   • Que se obteña previamente a certificación de discapacidade do IMSERSO ou entidade xestora correspondente á Comunidade Autónoma que teña transferida a súa xestión.

   Nestes casos requírese o previo recoñecemento Administración tributaria do dereito do adquirente antes de efectuar a compra do vehículo. Deberase xustificar o destino do vehículo.

2. As vendas de vehículos adaptados para persoas con mobilidade reducida (tara non superior a 350 kg e velocidade non superior a 45 km/h) e de cadeiras de rodas para uso exclusivo de persoas con discapacidade.

3. Os servizos de adaptación dos seguintes vehículos:

   • Autotaxis e autoturismos para o transporte de persoas con discapacidade en cadeiras de rodas.

   • Vehículos para o traslado habitual de persoas con discapacidade en cadeiras de rodas ou con mobilidade reducida, con independencia de quen sexa o condutor dos mesmos.

4. Os servizos de reparación de vehículos especiais para persoas con mobilidade reducida (tara non superior a 350 kg e velocidade non superior a 45 km/h) e cadeiras de rodas para uso exclusivo de persoas con discapacidade.

   A reparación do resto dos vehículos tributa ao 21 %, aínda que estean destinados ao transporte de persoas con discapacidade ou con mobilidade reducida.

Serán admisibles os seguintes medios de proba:

• A titularidade do vehículo a nome da persoa con discapacidade.

• Que o adquirente sexa cónxuxe da persoa con discapacidade ou teña unha relación de parentesco en liña directa ou colateral ata o terceiro grao inclusive.

• Que o adquirente estea inscrito como parella de feito da persoa con discapacidade no Rexistro de parellas ou unións de feito da Comunidade Autónoma de residencia.

• Que o adquirente teña a condición de titor, representante legal ou gardador de feito da persoa con discapacidade.

• Que o adquirente demostre a convivencia coa  persoa  con discapacidade mediante certificado de empadroamento ou por ter o domicilio fiscal na mesma vivenda.

Para os efectos da aplicación do tipo do 4 %de IVE na compra dun vehículo, a mobilidade reducida deberase acreditar mediante certificado ou resolución expedida polo Instituto de Maiores e Servizos Sociais (IMSERSO) ou órgano competente da Comunidade Autónoma correspondente.

Consideraranse, en todo caso, persoas con mobilidade reducida:

• As persoas cegas ou con deficiencia visual e, en todo caso, as afiliadas á Organización Nacional de Cegos Españois (ONCE) que acrediten a súa pertenza á mesma mediante o correspondente certificado.

• Os titulares da tarxeta de estacionamento para persoas con discapacidade emitida polas Corporacións Locais ou, se é o caso, polas Comunidades Autónomas, quen, en todo caso, deberán contar co certificado ou resolución expedida polo Instituto de Maiores e Servizos Sociais (IMSERSO) ou órgano competente da Comunidade Autónoma correspondente, acreditativo da mobilidade reducida.

Para facer a solicitude e achegar a documentación entra na seguinte ligazón: