Quen está obrigado a practicar retencións no Imposto sobre Sociedades?

O Artigo 41 da Lei 27/2014, do 27 de novembro, do Imposto sobre Sociedades (LIS), limítase a sinalar que serán deducibles da cota íntegra as retencións a conta.

De acordo co artigo 128 LIS as entidades, incluídas as comunidades de bens e as de propietarios, que satisfagan ou aboen rendas suxeitas ao Imposto sobre Sociedades estarán obrigadas a reter ou a efectuar ingresos a conta, en concepto de pagamento a conta, a cantidade que resulte de aplicar as porcentaxes de retención que se indican mas adiante  á base de retención, e a ingresar o seu importe no Tesouro nos casos e formas que se establezan.

Tamén estarán obrigados a reter e ingresar as persoas físicas respecto das rendas que satisfagan ou aboen no exercicio das súas actividades económicas, así como as persoas físicas, xurídicas e demais entidades non residentes en territorio español que operen nel mediante establecemento permanente.

Así mesmo, estarán obrigadas a practicar retención ou ingreso a conta as entidades aseguradoras domiciliadas noutro Estado membro do Espazo Económico Europeo que operen en España en réxime de libre prestación de servizos, en relación coas operacións que se realicen en España.

O suxeito obrigado a reter deberá presentar nos prazos, forma e lugares que se establezan declaración das cantidades retidas ou declaración negativa cando non se producise a práctica destas . Así mesmo, presentará un resumo anual de retencións. Os modelos de declaración correspondentes aprobaranse polo ministro de Facenda.