2.5. Valoración da Axencia Tributaria polos cidadáns
Enquisas e estudos de opinión
O Instituto de Estudos Fiscais do Ministerio de Facenda levou a cabo en 2023 o estudo demoscópico “Opinións e actitudes fiscais dos españois en 2022”. Este informe realízase anualmente e tamén é coñecido como “Barómetro Fiscal”.
O estudo realízase a partir dunha mostra de tres mil cidadáns, distribuídos en cinco segmentos (empresarios, agricultores, profesionais, asalariados e inactivos), seleccionados por cotas de hábitat, xénero e idade e utilizando a técnica de entrevista persoal, con aplicación dun cuestionario estruturado.
A comparación das valoracións obtidas en 2023 coas de anos anteriores (escala sobre 4) mostra que a imaxe positiva dos servizos da Axencia Tributaria está consolidada entre os cidadáns, cunha valoración media do 3.
Ademais, neste estudo analízase a opinión dos cidadáns respecto dos funcionarios da Axencia Tributaria, que obteñen a consideración de bos técnicos, imparciais no desempeño do seu labor e correctos no trato persoal.
Valoración dos servizos en campaña da renda polos contribuíntes
A Axencia Tributaria mediante a “Enquisa do Imposto sobre a Renda das Persoas Físicas 2022 ”desenvolvida durante o ano 2023 sonda a opinión dos usuarios, sobre os servizos ofrecidos.
Os usuarios manifestan a súa opinión sobre o uso dos seguintes servizos: o servizo RENØ para obter o número de referencia, Cl@ve PIN, a app "Axencia Tributaria ", o servizo de axuda para a presentación telemática da declaración (Renda Web), o servizo de cita, o servizo de asistencia para a presentación da declaración por teléfono e en oficinas, o servizo de videoasistencia e a información e trámites facilitados a través da Sede da Axencia Tributaria.
Con respecto ao nivel de satisfacción dos usuarios co servizo de axuda para presentar a declaración da Renda 2022 (Renda Web), os contribuíntes que manifestan sentirse satisfeitos, bastantes satisfeitos ou moi satisfeitos con respecto á mesma supoñen un 78,87% de que manifestaron utilizar este servizo.
Queixas e suxestións. Consello para a Defensa do Contribuínte
O Consello para a Defensa do Contribuínte, órgano colexiado adscrito á Secretaría de Estado de Facenda, vela pola efectividade dos dereitos dos obrigados tributarios, atendendo as queixas que se producen pola aplicación do sistema tributario que realizan os órganos do Estado e efectúa as suxestións e propostas pertinentes na forma que regulamentariamente se determina. Réxese, no referente á súa competencia, composición e funcionamento, polas súas normas específicas.
Aparece como garante dos dereitos dos cidadáns nas súas relacións tributarias, co fin de garantir un maior achegamento da Administración aos cidadáns.
A Axencia Tributaria presta apoio técnico e asistencia administrativa ao Consello, así como de formación e análise da información derivada das queixas a través da Unidade Operativa do Consello para a Defensa do Contribuínte, integrada no Servizo de Auditoría Interna e coordinada pola súa directora.
En 2023 e en relación con actuacións da Axencia Tributaria presentáronse ante o Consello para a Defensa do Contribuínte un total de 6.374 queixas e suxestións (6.205 queixas e 169 suxestións), un 14,96% menos que no ano anterior, e un 8,35% menos que en 2021.
No Cadro nº 11. Queixas e suxestións. Principais rúbricas 2023 do Anexo, recóllense as principais rúbricas en que se agrupan os motivos das queixas e suxestións para 2022. Así mesmo, a información de detalle pode consultarse na Memoria anual do Consello para a Defensa do Contribuínte, que recolle as cifras definitivas aprobadas no Pleno do Consello.