• Intervidos 8.980 produtos de diferentes marcas valorados en 1.436.800 euros

• Un dos tres establecementos rexistrados dispuña dunha porta oculta tras a cal se agochaba outro local destinado á venda e almacenaxe das falsificacións

11 de marzo de 2025.- Funcionarios de Vixilancia Aduaneira da Axencia Tributaria, no marco da operación ‘Vitoria’, interviñeron na localidade do Portús , na fronteira hispano-francesa en Girona, 8.980 produtos falsificados valorados en 1.436.800 euros e tomaron declaración a tres persoas en calidade de investigados.

A operación desenvolveuse o pasado día 25 de febreiro, cando os funcionarios de Vixilancia Aduaneira inspeccionaron tres establecementos comerciais. Os establecementos contaban cunha parte aberta ao público, con mostradores en que practicamente toda a mercadoría era de marcas brancas, agás un número reducido de zapatillas, camisetas e bolsos.

Porén, tras realizar unha análise minuciosa do local, localizáronse en cada tenda diferente portas camufladas como paredes ou espellos, que permitían o acceso a almacéns ocultos cheos de pezas de roupa falsificadas. Un dos locais inspeccionados contaba cunha falsa parede tras a que se accedía a outra tenda completa con andeis cheos de pezas de roupa deportivas, calzado, cintos e perfumes.

Tras solicitarse a asistencia de varios peritos, estes acreditaron nunha primeira inspección que a mercadoría era falsificada. En total interviñéronse 8.980 produtos, entre os que se encontran zapatillas, roupa deportiva, abrigos, bolsos, moedeiros, cintos, perfumes e lentes, así como caixas e logos que aínda non se utilizaran. O valor estimado das mercadorías podería ascender a 1.436.800 euros.

Ademais, tomouse declaración como investigados aos tres administradores dos establecementos comerciais.

Consciente do grave prexuízo económico e social que supón o negocio das falsificacións, a loita contra a falsificación e a pirataría é unha das áreas preferentes de investigación da Axencia Tributaria, que desa forma combate o perigo que causan ao consumidor os artigos falsificados e a competencia desleal que supoñen para o sector empresarial.

No desenvolvemento da operación participaron un total de 40 efectivos da Unidade Central de Investigacións Especiais da Subdirección Xeral de Operacións e unidades operativas de Vixilancia Aduaneira en Girona e Barcelona, co apoio da Unidade do Grupo de Intervención.