O Real Decreto-lei 9/2024, do 23 de decembro, polo que se adoptan medidas urxentes en materia económica, tributaria, de transporte, e de Seguridade Social, e prorróganse determinadas medidas para facer fronte a situacións de vulnerabilidade social, aproba determinadas medidas de carácter tributario, entre as que cómpre destacar as seguintes:

IRPF

• Con efectos do 1 de xaneiro de 2025 elévase a 2.500 euros a contía total dos rendementos íntegros do traballo procedente do segundo e restantes pagadores que obrigan a presentar a declaración da renda, polo que non estarán obrigados a presentar a declaración de Renda aqueles contribuíntes con ingresos de ata 22.000 euros que teñan máis dun pagador sempre que a suma das rendas do segundo ou restantes pagadores non superen os 2.500 euros (ata agora eran 1.500 euros).

• Prorrógase ata o 31 de decembro de 2025 a dedución por obras de mellora da eficiencia enerxética de vivendas.

• Prorrógase ata o 31 de decembro de 2025 a dedución pola adquisición de vehículos eléctricos enchufables e de pila de combustible e puntos de recarga.

• Con efectos do 1 de xaneiro de 2024 aplicarase a imputación de rendas inmobiliarias ao 1,1 por cento se os inmobles están localizados en municipios con valores catastrais revisados, sempre que entrasen en vigor a partir do 1 de xaneiro de 2012.

Estimación obxectiva en IRPF. Réxime simplificado e réxime especial da agricultura, gandaría e pesca do IVE

• Con efectos do 1 de xaneiro 2025 e vixencia indefinida, prorróganse durante 2025 os límites cuantitativos que delimitan no IRPF o ámbito de aplicación do método de estimación obxectiva, con excepción das actividades agrícolas, gandeiras e forestais, que teñen o seu propio límite cuantitativo por volume de ingresos. Tamén se prorrogan para o período impositivo 2025 os límites para a aplicación do réxime simplificado e o réxime especial da agricultura, gandaría e pesca, no IVE.

• O prazo para presentar as renuncias ou revogacións do método de estimación obxectiva do IRPF e dos réximes especiais simplificados e da agricultura, gandaría e pesca do Imposto sobre o Valor Engadido, será desde o 25 de decembro de 2024 ata o 31 de xaneiro de 2025. Non obstante, serán válidas as renuncias e revogacións para 2025 que se presentasen entre o 1 e o 24 de decembro de 2024; tamén se poderán modificar as renuncias ou revogacións solicitadas nesas datas, ata o 31 de xaneiro de 2025.

IVE

• Introdúcense determinadas medidas en relación cos depósitos fiscais de gasolinas, gasóleos e outros carburantes.

 Imposto sobre sociedades

• Con efectos do 1 de xaneiro de 2025, prorrógase ao exercicio 2025 a liberdade de amortización para aqueles investimentos que utilicen enerxía procedente de fontes renovables.

Outros impostos

• Atrásase ata o 1 de abril de 2025 a entrada en vigor do novo Imposto sobre os líquidos para cigarros electrónicos e outros produtos relacionados co tabaco. As autoliquidacións correspondentes aos períodos de liquidación dos meses de abril, maio e xuño de  2025, deberanse presentar do   1 ao   20 de xullo de  2025. Tamén se establece a regularización dos produtos obxecto do imposto almacenados á entrada en vigor do Imposto sobre os líquidos de cigarros electrónicos e outros produtos relacionados co Tabaco.

• Introdúcense modificacións no Imposto sobre a marxe de intereses e comisións de determinadas entidades financeiras, con efectos para os períodos impositivos que se inicien desde o  1 de xaneiro de  2024, que afectan fundamentalmente ao período impositivo e á devindicación do imposto. Consecuentemente, adáptanse os prazos para efectuar o pagamento fraccionado e a autoliquidación do imposto.

Tamén se establece o réxime fiscal aplicable ao desenvolvemento e celebración dos finais da “UEFA Champions League Feminina 2024” e da “UEFA Europa League 2025”.