Recarga de equivalencia [Modelo 036]

Trátase dun réxime obrigatorio para os comerciantes retallistas, de aplicación automática cando se inicia a actividade e ao que non se pode renunciar. É un réxime compatible con todos os demais. Polas operacións realizadas neste réxime non existe obriga de presentar declaracións de IVE.

O réxime especial da recarga de equivalencia (recadro 514 “alta ”) aplicarase aos comerciantes retallistas que sexan persoas físicas ou entidades en réxime de atribución de rendas no Imposto sobre a Renda das Persoas Físicas, en que todos os seus membros sexan persoas físicas, que comercialicen polo miúdo artigos ou produtos de calquera natureza non exceptuados na súa normativa reguladora e que cumpran os requisitos que se determinan regulamentariamente.

Exemplo: resulta de aplicación o réxime especial da recarga de equivalencia á actividade económica de comercio polo miúdo de mobles, clasificada no epígrafe do IAE 653.1.

A falta de concorrencia dos citados requisitos determina o cesamento na aplicación deste réxime especial á actividade que desenvolve (recadro 514 “baixa ”).

No suposto de que o suxeito pasivo a quen sexa de aplicación este réxime especial realizase outras actividades empresariais ou profesionais suxeitas ao Imposto sobre o Valor Engadido, a de comercio polo miúdo sometido ao devandito réxime especial (recadro 515) terá, en todo caso, a consideración de sector diferenciado da actividade económica. Véxase no apartado “Deducións” deste mesmo capítulo o indicado respecto do porcentaxe provisional de dedución, para os efectos do artigo 111.dous da Lei do IVE (recadro 586) en relación con este réxime especial de recarga de equivalencia.

Aos efectos da Lei do IVE, consideraranse comerciantes retallistas os suxeitos pasivos en quen concorran os seguintes requisitos:

1. Realizar con habitualidade entregas de bens mobles ou semoventes sen haberos sometido a proceso algún de fabricación, elaboración ou manufactura por si mesmos, ou por medio de terceiros.

   Non se considerarán comerciantes retallistas, en relación cos produtos por eles transformados, quen sometesen os produtos obxecto da súa actividade por si mesmos ou por medio de terceiros, a algúns dos procesos indicados no parágrafo anterior, sen prexuízo da súa consideración como tales respecto doutros produtos de análoga ou distinta natureza que comercialicen no mesmo estado en que os adquiriron.

2. Que a suma das contraprestacións correspondentes ás entregas dos devanditos bens á Seguridade Social, ás súas Entidades Xestoras ou colaboradoras ou a quen non teñan a condición de empresarios ou profesionais, efectuadas durante o ano precedente, excedese do 80 por 100 do total das entregas realizadas dos citados bens.

   O requisito establecido no parágrafo anterior non será de aplicación en relación cos suxeitos pasivos que teñan a condición de comerciantes retallistas segundo as normas reguladoras do Imposto sobre Actividades Económicas, sempre que neles concorra algunha das seguintes circunstancias:

   1. Que non poidan calcular a porcentaxe que se indica no devandito parágrafo por non realizar durante o ano precedente actividades comerciais.
   2. Que lles sexa de aplicación e non renunciasen á modalidade de signos, índices e módulos do método de estimación obxectiva do Imposto sobre a Renda das Persoas Físicas.