O traslado da mal chamada “planificación fiscal agresiva” desde a fase liquidatoria á fase recadadora que tivo lugar nos últimos anos caracterizouse, entre outras condutas, pola situación por parte dos debedores dos seus bens e dereitos de contido económico noutras xurisdicións fiscais distintas daquelas en que se xera a débeda tributaria, como estratexia principal para obstaculizar as actuacións de embargo.

A devandita circunstancia remarcou a inexorable necesidade de impulsar e reforzar a cooperación administrativa internacional como mecanismo idóneo para tutelar o cobramento dos créditos tributarios, superando as limitacións derivadas da configuración territorial da soberanía.

A necesidade de dar resposta á problemática anteriormente indicada conduciu á creación do Equipo Nacional de Cobramento Internacional (de agora en diante, ENCI), dependendo da Subdirección Xeral de Coordinación e Xestión do Departamento de Recadación, mediante a Resolución do 27 de maio de 2023, da Presidencia da Axencia Estatal de Administración Tributaria, sobre organización, funcións e atribución de competencias na área de recadación (BOE 1 de xuño de 2023).

A creación do ENCI forma parte da aposta realizada por parte da Axencia Tributaria para reforzar a cooperación administrativa e a asistencia mutua no ámbito internacional para asegurar que todos os contribuíntes con obrigas tributarias en España estean sometidos ao mesmo grao de control, en función do seu risco fiscal, con independencia de que operen ou teñan bens ou dereitos fóra do territorio español.

Neste sentido, debe destacarse que a planificación centralizada no ámbito da asistencia mutua na recadación é un dos piares das actuacións complexas de control en materia de recadación que se prevén no Plan Estratéxico da Axencia Tributaria 2024-2027.

Desde un punto de vista organizativo, a creación do ENCI posibilitou o impulso dunha planificación sistematizada e centralizada no Departamento de Recadación que permita maximizar tanto o número de peticións enviadas ou recibidas doutros Estados, baixo un criterio homoxéneo.

Froito do indicado, conseguiuse aumentar o número de tramitacións de peticións de asistencia mutua recibidas doutros Estados, así como aumentar exponencialmente o número de peticións enviadas a outros Estados, co conseguinte incremento de ingresos.

O citado incremento ten un dobre efecto:

• Un efecto directo: derivado da propia actuación de petición de cobramento.
• Un efecto inducido: na medida que, impulsando este tipo de actuacións, os debedores toman conciencia de que a Axencia Tributaria realiza ordinariamente, nas súas actuacións tendentes ao cobramento de débedas e a través da colaboración doutros Estados, a traba de bens e dereitos de contido económico situados fóra do territorio nacional.

Adicionalmente o ENCI tamén está traballando en potenciar a presenza dos funcionarios da área de recadación nas actuacións de xestión recadadora desenvolvidas por outros Estados.