Coordinación co réxime de estimación obxectiva (módulos) do IRPF
Para que un suxeito pasivo poida estar en réxime simplificado de IVE ten que estar, pola mesma actividade, no réxime de estimación obxectiva do IRPF.
Exemplo: O epígrafe do IAE 419.1 correspondente á actividade económica “industrias do pan e da bolaría ”encóntrase incluído no ámbito de aplicación do método de estimación obxectiva e no do réxime especial simplificado.
As actividades que están en réxime de estimación obxectiva en IRPF son máis das que están en réxime simplificado de IVE. En consecuencia, a actividade que tributa en estimación obxectiva de IRPF só pode tributar en IVE de acordo con algún destes tres réximes especiais: o simplificado, o de recarga de equivalencia ou o de agricultura, gandaría e pesca.
Pola súa parte, a renuncia en IVE ao réxime simplificado, ou ao réxime especial de agricultura gandaría e pesca supón a exclusión da estimación obxectiva en IRPF. E a renuncia ao réxime de estimación obxectiva do IRPF supón renunciar tamén no IVE ao réxime simplificado e ao réxime da agricultura, gandaría e pesca.
En definitiva, non hai unha relación biunívoca entre os réximes simplificado e de estimación obxectiva, é dicir, aínda que todo aquel contribuínte que está incluído no réxime simplificado no IVE necesariamente está en estimación obxectiva no IRPF, a inversa non sempre é certa.
Exemplo: unha mercería está en módulos en IRPF e en recarga de equivalencia en IVE.
Sistema de incompatibilidades nos réximes do IVE
NOTAS:
Os réximes con fondo escuro son obrigatorios.
(1) e (2) O réxime será compatible co resto de réximes do imposto. Agora ben, se existen actividades en réxime especial simplificado, o REAGP é incompatible cos réximes marcados con 1, pero se o suxeito inicia unha actividade en Axencia de Viaxe ou en Ouro Investimento (réximes obrigatorios) ou en réxime xeral, non pode estar en Réxime simplificado, e tampouco se inicia e non renuncia actividade en Bens Usados ou Servizos Electrónicos.
(3) Se ten actividades en réxime simplificado e non renuncia ao réxime de bens usados, non pode estar en réxime simplificado. Se está en bens usados non pode iniciar actividade en réxime simplificado.
(4) Se ten actividades en réxime simplificado e inicia actividade en Axencia de viaxe, non pode estar en réxime simplificado. Se está en Axencia de Viaxe non pode iniciar actividade en Réxime Simplificado.
(5) Se ten actividades en réxime simplificado e inicia actividade en Ouro investimento, non pode estar en réxime simplificado. Se está en Ouro investimento non pode iniciar actividade en Réxime Simplificado.
(6) Se ten actividades en réxime simplificado e non renuncia ao réxime de Servizos electrónicos, non pode estar en réxime simplificado. Se está en Servizos electrónicos, non pode iniciar actividade en réxime simplificado.
Na incompatibilidade do réxime simplificado co réxime xeral, habería que considerar a excepción prevista no art. 36.1.e) RIVE : "Non obstante, a realización polo suxeito pasivo doutras actividades en cuxo desenvolvemento efectúe exclusivamente operacións exentas do Imposto por aplicación do artigo 20 da súa Lei reguladora ou arrendamentos de bens inmobles cuxa realización non supoña o desenvolvemento dunha actividade económica de acordo co que se dispón na normativa reguladora do Imposto sobre a Renda das Persoas Físicas non suporá a exclusión do réxime simplificado.”
NOTA XERAL:
Cando un suxeito pasivo que estiver realizando unha actividade empresarial en réxime simplificado, iniciase outra á que for aplicable o réxime xeral ou un especial incompatible co simplificado, durante o ano natural en que iniciou a nova actividade seguirá tributando, pola actividade que xa exercía, no réxime simplificado.
Exemplo: inicio dunha actividade económica que consiste en traballos verticais na construción, tales como pequenas reparacións de construción en altura, selados de xuntas, impermeabilización de cornixas, reparacións e limpezas de fachadas e hidrofuxidos.
A clasificación das distintas actividades nas Tarifas do Imposto sobre Actividades Económicas realizarase atendendo á verdadeira natureza material das mesmas, e que de acordo coa regra 2ª da Instrución para a súa aplicación, aprobada canda aquelas polo Real decreto Lexislativo 1175/1990, do 28 de setembro, os suxeitos pasivos deberán matricularse e tributar por todas e cada unha das actividades que se exerzan de forma diferenciada unhas doutras e que teñan tratamento independente dentro das Tarifas.
- O epígrafe 501.3 da sección primeira das Tarifas clasifica a actividade de “Albanelaría e pequenos traballos de construción en xeral ”.
- O epígrafe 922.2 da sección primeira das Tarifas clasifica a actividade de “Servizos especializados de limpezas (cristais, chemineas, etc.)”.
Visto o anterior, o obrigado tributario que realiza as actividades de pequenas reparacións de construción en altura, cornixas, selado de xuntas, impermeabilizacións de cornixas, limpezas de fachadas e hidrofuxidos, deberá darse de alta pola realización das mesmas nos epígrafes da sección primeira devanditos, é dicir:
- Polos traballos de reparación en vertical, no epígrafe 501.3, ou, se é o caso, no epígrafe 501.1.
- Polos servizos de limpeza de fachadas, no epígrafe 922.2.
O obrigado tributario deberá darse de alta en dous epígrafes do IAE, polos traballos de reparación en vertical, no epígrafe 501.3, e polos servizos de limpeza de fachadas, no epígrafe 922.2.
Destas dúas actividades, unicamente está incluída, pola Orde Ministerial que aproba os módulos, no ámbito de aplicación do método de estimación obxectiva do IRPF e polo réxime especial simplificado do IVE, a matriculada no epígrafe 501.3 das tarifas do IAE, mentres que a actividade de servizo de limpeza de fachadas, epígrafe 922.2, non está incluída no ámbito de aplicación destes réximes.
Por outra banda, o Regulamento do Imposto sobre a Renda das Persoas Físicas, establece a incompatibilidade entre a estimación directa e a estimación obxectiva, considerandose, polo citado Regulamento, esta incompatibilidade como causa de exclusión do método de estimación obxectiva.
Polo tanto, como a actividade de servizos de limpeza de fachadas ten que determinar o seu rendemento neto polo método de estimación directa, a outra actividade quedará excluída da estimación obxectiva, debendo determinar o rendemento neto das actividades desenvolvidas polo método de estimación directa.
Polo que se refire ao IVE, o artigo 36.1.e) do Regulamento deste Imposto, aprobado polo Real decreto 1624/1992, 29 de decembro, establece como causa de exclusión do réxime especial simplificado a realización de actividades non acollidas aos réximes especiais simplificados, da agricultura, gandaría e pesca ou da recarga de equivalencia.
Neste caso, o obrigado tributario desenvolve unha actividade (servizos de limpeza de fachadas) que non está incluída no ámbito de aplicación do réxime simplificado e non se pode acoller a ningún dos réximes especiais citados no parágrafo anterior, polo que quedará excluído deste réxime especial para a outra actividade desenvolvida, debendo tributar no IVE, por ambas as dúas actividades, polo réxime xeral. (Consulta vinculante DGT V0791-07)